dr Schorsch

ich bi dr Schorsch vom Haafebeggi II

dye neuje Konsipfanne ha ich au dehai

ich ha ändgültig jetz mit dääre Reegle broche

woos ghaisse het : uff alte Pfanne leert me koche

Nach oben

Ovomaltine

100 Joor lang sait my Frau gits Ovomaltine

und gueti 70 Joor dr vo sufft das scho Myne

do ligt doch s Potenzial zum spaare sait my Frau

gän doch de Alte OVO anschtat d AHV

Nach oben

dr Peter Sauber

dr Peter Sauber lüttet mir gescht zoobe a

liebe Schorsch ich bruch no ganz e schnälle Maa

ich ha ihm gsait : ich kenn do ain dä könntisch nee

är isch Ex-Drämmlifierer bi dr BVB

Nach oben

s Rezäpt

ich sag zur Frau : ich ha das Ässe fescht verschproche

und waiss s Rezäpt nümm wye ni muess dye Suppe koche

bisch wye dr Blocher sait my Frau z mittst in dr Nacht

zerscht soone Schnuure und denn waisch nit wye mes macht

Nach oben

d Miss Schwanger Waal

Basel macht jetz denn im Mai " d Miss Schwanger Waal "

aanend für sich wär mir dye Waal jo sooo egaal

doch wye so ligt dye Waal nur bi de Fraue dinne

also wär ich zuegloo wurd beschtimmt kai Frau me gwinne

Nach oben

d Svenja

My Änggeli Svenja nimmt bekannt kai Blatt vors Muul

wo sii dye Kinderzytyg liist do maint sy cuul

dämm Blatt for Kids fääl doch dr letschti Megazwigg

do stoot dr glychy Schyssdrägg dinne wye im Bligg

Nach oben

d Beärdigung

Ich schryyb dämm Amt : bi eure Schulde isch s normale

dass ich jetz my Beärdigung muess sälber zaale

nur wett y wüsse ha ni gschriibe mitteme Gruess

ebb ich denn vorhär oder noochhär zaale muess

Nach oben

dr Babba

My Fründ dr Papscht isch wiider e bitzli besser zwääg

är het mr gmailt är kääm woorschyyns dye näggschte Dääg

Breggdänzer haige ihn erfreut dye halbi Nacht

jetz kääm är gärn zue mir und zaig mir wye mes macht

Nach oben

d Schwyzer Schyy Rennfaarer

Im Schwyzerfärnsee duet dr Hüppi als proleete

d Schwyzerschyyrennfaarer kömme wye Rageete

dr by wenn sy als doobe s Renne schtarte , s richtige

sinn d Schwyzer als grad fertig unde mit besichtige

Nach oben

Muusig-Stars

Jede Sunntig-Zoobe fliegt doch ain vo dääne

Musiggschtaare use under vyle Drääne

guet wye me dye behandlet isch scho wirgglig fyys

doch wär dört gwünnt macht au sy Wääg am Schnaabelpryys

Nach oben

d Alinghi

dr Bertarelli sait mir : Schorsch wenns dir nit schtinggi

no könnsch als Schtüürmaa ko zue mir uff my Alinghi

das wird nie glabbe : saag ich zue nem z letscht e mänd

hesch s Gfüül my Frau gääb kampfloos s Rueder uss de Händ

Nach oben

Däängs Giving Deej

Am Dänggs Giving Deej do het dr Busch sy Reed

in de Händ e Plastigg-Trutthaan wye me gseet

lueget my a : schreyt dä Haan s isch nit zum saage

ich ha im Busch verdraut jetz fäält mir Kopf und Graage

Nach oben

d'Bängg..